Ministrja e Infrastrukturës, Energjisë dhe Transporteve Belinda Balluku, së bashku me ministrin Blendi Klosi kanë mbërritur në kanionin e Holtës, për të zhvilluar një dëgjesë me banorët e zonës. Këta të fundit kundërshtojnë ndërtimin e HEC-it që shkatërron këtë pasuri natyrore.
Gjatë fjalës së saj, Balluku tha se tashmë janë pezulluar punimet në këtë kanion dhe se është e interesuar të dëgjojë çfarë mendojnë banorët:
“Kam ndërmarrë pezullimin e të gjitha aktiviteteve të HEC-eve, për të bërë një skanim të pastër të statusit të tyre juridik dhe përputhshmëria me impaktin mjedisor që ata krijojnë. Duhet të jeni të qetë, kemi ndërmarrë një tur dëgjesash sa i takon kësaj problematike. Kemi interes të dëgjojmë se çfarë mendoni ju”.
Nga ana tjetër, ministri Klosi bëri propagandë të hapur, teksa u fokusua të rëndësia që ka opinioni publik për qeverinë:
“Ndjesë për ata që janë shqetësuar për zhvillimet në këtë kanion. Kemi ardhur të dëgjojmë opinionin e njerëzve, do jemi gjatë gjithë kohës në shërbim të tyre. Pezullimi i punimeve është shprehje e dëgjueshmërisë. Unë e kam thënë shpesh, iniciativa private duhet të shkojë në përputhje me interesat e të gjithëve. Për ne grupi më i madh i interesit janë qytetarët.
Prandaj siç kemi zhvilluar disa dëgjesa, siç kemi bërë disa ndalesa, siç pezulluam një koncesionar që kishte të bënte me pyjet e Dibrës, jemi këtu për të dëgjuar opinionin publik”, tha Klosi.
“Lëruani njerëzve ta sodisin këtë bukuri. Këtu vijnë kushedi sa njerëz. Për çfarë bllokohet? S’kishte vend më poshtë? Ne pimë ujë të pijshëm nga këtu”, tha një nga banorët.
I pranishëm në takim, Balla tha se duhet gjetur një ekuilibër ekonomik që çdo bukuri natyrore të shfrytëzohet për zhvillimin ekonomik, por duke mos prekur bukuritë natyrore. Numri 2 i PS dha garancinë për qytetarët se do e mbajnë fjalën për këtë kanion.
Kujtojmë se prej ditësh këto punime shkatërrimtare të bukurisë natyrore të Kanionit të Holtës kanë sjellë një reagim të madh të qytetarëve.
Edhe dje ka pasur një protestë para Kryeministrisë, ku u kërkua të ndalohej ndërtimi i këtij HEC-i apo punimet naftëkërkuese në Zagori. Qytetarët kanë kritikuar qeverinë teksa thanë se pezullimi i punimeve nuk është zgjidhje sepse tashmë dëmi është bërë, por duhet ndaluar menjëherë ndërtimi i këtij HEC-i./ TIRANA TODAY
