Sot kreu i Kuvendit, Gramoz Ruçi, hapi seancën plenare, ku të pranishëm në sallë janë kryeministri Edi Rama, ministrat dhe deputetët e Partisë Socialiste.
Pjesë e seancës janë bërë edhe disa deputetë të opozitës, për diskutuar dy amendamentet e opozitës, që plotësojnë disa prej kërkesave të studentëve.
Në fjalën e tij, deputeti socialist Taulant Balla ka qëndruar në të njëtën linjë me kryeministrin Rama, ku foli sërish për dialog.
Ai tha se nuk kanë asnjë arsye për tu tallur me studentët, një qëndrim që është përgënjeshtruar nga radhët e LSI.
“Dua ta them troç. Të gjitha kërkesat e studentëve do të plotësohen një më një. Por jo me dialog me ju, por me ata që meritojnë të gjithë respektin e këtij Kuvendi, e këtij kombi,” tha Balla.
Ai gjithashtu bëri me dije se kryeministri Rama ka nisur një proces për zgjidhjen e 8 pikave, por dhe problematikave të tjera që rëndojnë mbi studentët.
“Kryeministri ka iniciuar një proces, që do shkojë hap pas hapi deri në zgjidhjen përfundimtare jo të 8 pikave, por dhe më shumë sëmundjeve në universitetet tona që ne nuk kemi mundur t’i zgjidhim në këto vite qeverisje.
Ka dhe problematika që lidhen me kurrikulat, e shumë të tjera. Si ka mundësi të talleni me ata që janë në shesh? Si ta ndryshoj unë buxhetin, Petrit, kur është te Ilir Meta, te Presidenti i Republikës.
28 vite tallje, e doni të bëni 28 minuta tallje e këtu në Parlament. Ne e kemi nisur procesin, dhe të jeni i sigurtë që ky proces dialogu do të sjellë zgjidhje”, u shpreh Balla.
