Sikundër Ministria e Brendshme e cila u vu në mbrojtje të Ramës për refugjatët, edhe Taulant Balla nuk ka hequr asnjë pikë e asnjë presje nga ky qëndrim. Me bindje të plotë, ai ka thënë para mediave se nuk ka asnjë plan, as negociata, as bisedë për këtë çështje. Duke qëndruar në të njëjtën linjë, ai bëri edhe një krahasim, që nuk gjen vend në këtë drejtim.
Kreu i Grupit Parlamentar të PS-së, Taulant Balla, e kaloi këtë çështje me nota humori, ndërsa tha më tej se Shqipëria do të mbajë përgjegjësitë e veta dhe se qytetarët nuk duhet të delirojnë pas rrjedhjeve psiqike nëpër rrjetet sociale.
“E dyta që do ndaja me ju është që një budalla, hedh një gurë në lumë dhe qindra të mençur duan të sqarojnë opinionin. Ajo që ka të bëjë është me dezinformimin që në Shqipëri do të vendosen kampe, për të strehuar 600 mijë azilantë.
Ka një dallim se njëherë thonë luftëtarë të ISIS dhe njëherë 600 mijë persona. Lexojini rrjedhjet psiqike në rrjetet sociale. Ajo që dua të sqaroj se nuk ka asnjë plan, asnjë negociata, as bisedë me këtë çështje.
Ka vetëm rikthim të shqetësimit për një kanal të ri që lidh Europën juglindore me Europën qendrore të rrugës që vijnë me konflikte. Shqipëria as nuk ka negociuar dhe s’ka as kapacitete për të strehuar numra të tillë.
Një vend si Shqipëria që mund të jetë pjesë e këtij kanali transferimi, duhet të mbajë përgjegjësinë e veta për aq sa i takojnë këllqet. Shqipëria do të mbajë përgjegjësitë e veta për aq sa i takon”, tha Balla.
