Shumë prej nesh kanë dëgjuar për lojën e tmerrshme “Balena Blu”, e cila të çon deri në vetëvrasje.
Rastet janë me qindra në botë, ndërsa numri më i lartë i vetëvrasjeve shënohet në Rusi.
Megjithatë, bëni mirë të tregoheni të kujdesshëm, pasi kjo lojë e rrezikshme ka mbërritur edhe në vendin tonë.
Edhe pse autoritetet nuk e pohojnë këtë, janë vetë fëmijët që thonë se e luajnë lojën dhe dinë shumë detaje rreth saj.
“Mua më kanë marrë në telefon dhe më kanë pyetur a dëshiron ta luash Balenën Blu? Por unë e dija që ishte e rrezikshme dhe iu përgjigja: Jo. Pastaj mora kartën dhe e theva”, tha një fëmijë.
“Njoh dy veta në klasën time që e luajnë. Është një lojë interesante thonë se ka të bëjë me jetën tonë dhe nëse bie nga lartësia nuk të gjen gjë”, tha një vajzë.
“Një djalë i klasës time ka çarë dorën, por tani ka fikur celularin se e ka kapur vëllai dhe ia ka ndaluar vëllai”, dëshmoi një tjetër.
“Luajnë dy shokët e mi, njëri është në nivelin 31 dhe tjetri në të 35-n. I detyrojnë të zgjohen në mes të natës, folin me vete, janë si lojëra të çmendura”, tha një tjetër fëmijë.
Këto janë disa nga dëshmitë tronditëse të marra nga BalkanWeb, ku dëshmohet se fëmijët jo vetëm e njohin si lojë, por edhe kanë rrezikuar të bien në kurthin e saj, gjë që rezulton se kjo lojë është shumë më popullore se ç’mendohet.
Pavarësisht se fëmijët pohojnë se po luajnë me këtë lojë, policia nuk ka marrë denoncime konkrete.
“Deri në këto momente nuk kemi denoncime konkrete për këtë lojë”, tha Artan Dashi, shef i krimit kibernetik në Tiranë.
Loja online e quajtur “Balena Blu” mesa duket përbën rrezik potencial edhe për fëmijët shqiptarë, pasi ka mbërritur prej kohësh në rrjetet sociale të adoleshentëve, më së shumti në Messengerin e Facebook-ut. Për këtë janë sërish fëmijët që sqarojnë sesi kontaktohen nga drejtuesit e lojës.
“Më kishte çuar ftesë, por kur thashë s’më intereson më bënë block”, tha njëri prej tyre.
“Fillimisht duan foton tënde, pastaj të shtëpisë dhe sfida e tretë ka të bëjë me një video ku ti gjuan veten me shpulla”, u shpreh një tjetër nxënës i shkollës 9-vjeçare.
Torturat e njëpasnjëshme nga kërkesat e një të panjohuri nisin përmes një presioni psikologjik dhe fëmijët krijojnë varësi nga një njeri i panjohur përtej kompjuterit.
Fëmijëve iu kërkohen sfida të vështira dhe të dhimbshme, si p.sh të presësh veten me thikë, të zgjohesh në orën 4:20 të mëngjesit për të parë videot horror që të dërgon personi anonim dhe sfida të tjera të dhimbshme që i jepen fëmijës për 50 ditë, deri në sfidën e fundit: Të hidhen nga tarraca e një pallati të lartë për t’u shpallur fitues i sfidës.
https://youtu.be/gpncIhnwWuA
