Është mbyllur mëngjesin e djeshëm greva e 18 të dënuarve të Burgut të Sigurisë së Lartë. Mësohet se të burgosurit janë transferuar në burgje të tjera. Ndërkohë organizatori i protestës e cila më pas u pasua në grevë urie në Burgun e Burrelit, ka qenë Ilir Kupa. Ose i njohur ndryshe si “babagjyshi”, i akuzuar për grabitjen me armë në një qendër tregtare në Tiranë.
Ai dhe 17 të dënuar të tjerë ia kanë arritur qëllimit të tyre për t’u transferuar nga Burgu i Sigurisë së Lartë Burrel, duke iu shmangur kështu rregullave strikte dhe kontrolleve të vazhdueshme të gardianëve, por edhe kushteve mizerabël që ka aktualisht ky burg.
Drejtori i Përgjithshëm i Burgjeve, Stefan Çipa, pasi ka parë nga afër kushtet ku janë izoluar të dënuar me burgime të përjetshëm dhe mbi 25 vjet është shprehur se gjendja nuk është normale dhe se situata duhet të ndryshojë. Ditë më parë ka nisur një investim i rëndësishëm për hidroizolimin e tarracës së burgut dhe përmirësimin e kushteve në mjediset e ajrimit të të dënuarve.
Ditë më parë, të dënuarit kishin paralajmëruar grevë urie, pasi sipas tyre kushtet dhe higjiena në burg është mjaft e rëndë. Ata u ankuan edhe për kuzhinën dhe refuzuan të hanin ushqimet e burgut duke pretenduar se fasulet, orizi, makaronat dhe mjaft produkte të tjera janë të pakonsumueshme, pasi përmbajnë miza dhe krimba.
Kushtet e këqija në Burgun e Burrelit i ka pranuar edhe institucioni i Avokatit të Popullit, i cili tri ditë më parë nëpërmjet një reagimi bëri të ditur se prej tri vitesh ka kërkuar mbylljen e këtij burgu për shkak të kushteve të papranueshme për të dënuarit.
