Kryeministri Edi Rama ka folur nga Himara, në ditën përmbyllëse të fushatës elektorale. Rama foli për ndryshimet e ndodhura në Himarë, ndërsa tha se duhet bërë më shumë, por ndryshimi është i dukshëm.
Gjatë fjalës së tij, kryeministri sulmoi edhe presidentin Meta, i cili dekretoi 13 tetorin si datën e re të zgjedhjeve lokale.
Rama tha se “baba Xhikja e di mirë çfarë është vula që ka në dorë, por s’e di çfarë vulos. Vula e dekreteve të marra janë vulat e panikut, e dëshpërimit dhe të grahmave të fundit të një revolucioni imagjinar.”
“30 qershorin s’e luan as topi, jo më filxhani i Monikës, dhe as dekretet. Se më kishte çuar dhe një letër dashurie mbrëmë, që çuditërisht e çoi mbasi u djeg KZAZ-ja. Reflektoni se e shifni çfarë po ndodh? Edhe kujton edhe Ramiz Alinë, po Ramiz Alia i shtyu zgjedhjet se ishte ngritur gjithë Shqipëria, po këtu cili popull është ngritur për të shtyrë zgjedhjet?”, tha ndër të tjera Rama.
Fjala e kryeministrit:
Qysh nga fushata e parë kjo do kishte qenë fushata më e bukur në rast se do kishte qenë një proces zgjedhor normal, me kandidatët përballë sepse në këto 4 vite kemi bërë punë që flasin më shumë se të gjitha fjalët. Në 2014-ën Himara ishte një Bathore, një vend i mbaruar pas asnjë lloj infrastrukture dhe pas asnjë lloj fuqie. Njerëzit që kanë vendosur të jetojnë këtu, mbijetonin në kushtet e varfërisë dhe falë burimeve të emigracionit ia dilnin. Sot Himara nuk është ajo që ne duam, por është në transformim e sipër. Sot mund të themi që kemi bërë shumë punë për Himarën që nuk janë mjaft, por janë mjaft për të kuptuar se ne jemi të vetmit që mund ta bëjmë dhe o e bëjmë ne, o nuk e bën askush tjetër.
Ky baba Xhikja e di mirë çfarë është vula që ka në dorë, por s’e di çfarë vulos. Vula e dekreteve të marra janë vulat e panikut, e dëshpërimit dhe të grahmave të fundit të një revolucioni imagjinar.
Kriminelët e zgjedhjeve janë njësoj të rrezikshëm e njësoj të neveritshëm si çdo kriminel tjetër.
30 qershorin s’e luan as topi, jo më filxhani i Monikës, dhe as dekretet. Se më kishte çuar dhe një letër dashurie mbrëmë, që çuditërisht e çoi mbasi u djeg KZAZ-ja. Reflektoni se e shifni çfarë po ndodh? Edhe kujton edhe Ramiz Alinë, po Ramiz Alia i shtyu zgjedhjet se ishte ngritur gjithë Shqipëria, po këtu cili popull është ngritur për të shtyrë zgjedhjet? Populli i atyre punonjësve bashkiake që i mori në qafë një hileqar, një i pabesë, një burrë që pi raki në klub e njerëzit i çon në burgje./ Tirana Today
