Koreja e Veriut dhe Koreja e Jugut kanë rihapur kanalet e tyre zyrtare të komunikimit pas më shumë se një viti pezullimi, njoftuan të dy vendet të martën.
Zyra presidenciale e Koresë së Jugut njoftoi se linja telefonike ndërkufitare midis dy Koreve u rihap, ndërsa agjencia shtetërore e lajmeve e Koresë së Veriut KCNA gjithashtu konfirmoi se linjat lidhëse u rikuperuan të martën në mëngjes. Masa erdhi në 68 vjetorin e nënshkrimit të marrëveshjes së armëpushimit që i dha fund Luftës Koreane.
Presidenti i Koresë së Jugut Moon Jae In ka shkëmbyer letra personale me udhëheqësin e Koresë së Veriut Kim Jong Un që nga prilli, tha zyra e tij, dhe të dy kanë rënë dakord për të rivendosur komunikimet. Hapi do të ndihmojë në përmirësimin e marrëdhënieve, tha zyra e Moon.
Koreja e Veriut në mënyrë të njëanshme ndërpreu të gjitha kanalet e komunikimit midis qeverive dhe forcave të armatosura të të dy vendeve qershorin e kaluar. Penjani po u përgjigjej fushatave të fletëpalosjeve propagandistike që synonin udhëheqjen e Koresë së Veriut dërguar nga aktivistët e Koresë së Jugut dhe refugjatët e Koresë së Veriut në kufi.
Koreja e Veriut është e izoluar ndërkombëtarisht për shkak të programit të saj të armëve bërthamore dhe përballet me sanksione të Kombeve të Bashkuara.
