Jo vetëm ish-kreu i SHISH, Fatos Klosi, por edhe Skënder Gjinushi është i mendimit se Berisha ka gisht në vrasjen e Azem Hajdarit. Në një intervistë që ka dhënë më herët për “Tirana Today”, ai e akuzon ish-kryeministri Berisha si një njeri me të shkuar të errët dhe se është në dijeni të çfarë ndodh. Në morinë e akuzave, Gjinushi e cilësoi atë si një njeri që shpif, e mbi të gjitha që deformon çdo të vërtetë.
“Akoma nuk jeni mësuar ju me Berishën, ka 27 vjet që nuk ka lënë njeri pa akuzuar, krim pa e ditur. Ai e di para se të bëhet krimi. Berisha nuk ka lënë njeri pa akuzuar, asnjë akuzë pa lëpirë, pra sipas rastit, ashtu e hedh edhe vallen. Është njeriu më delirant, më shpifës, më deformues i çdo të vërtete”.
Në 20 vjetorin e vrasjes se Dëshmorit të Kombit, Azem Hajdari, liderit të lëvizjes studentore që përmbysi diktaturën komuniste, Partia Demokratike e filloi ditën me një simpozium dhe ekspozitë “Ëndrra e Azemit: Shqipëria si Evropa”. Ajo që ra në sy ishte fakti se ky përvjetor ka bashkuar sërish te djathtën.
Berisha ndau këto kujtime për Azem Hajdarin: “Rrallë mund të gjendet një figurë në histori që u bë lider brenda një ore. Ai u bë lider duke vënë peng fëmijët e tij. Ai u tha studentëve se po të tradhtonte ata, do të tradhtonte Rudinën dhe Kirin”.
Vrasja e Azem Hajdarit u pasua nga një valë dhune që kulmoi me ngjarjet e 14 shtatorit, ndërsa 20 vjet pas ngjarjes, dosja e tij rihapet për ish-truprojën e Sali Berishës, Izet Haxhinë, i dënuar në mungesë, e që tani thotë se do të tregojë të vërtetat mbi misteret e vrasjes së Azemit.
