Dimitris Avramopoulos ka uruar Ilir Metën pas zgjedhjes së tij President i Republikës së Shqipërisë.
Me anë të një mesazhi urimi, Komisioneri i Bashkimit Evropian për Migrimin, Çështjet e Brendshme dhe Shtetësinë shkruan se është i bindur se përvoja e Metës do e çojë Shqipërinë drejt një të ardhmeje më të mirë, ndërsa thekson se rajoni ka nevojë për udhëheqës, të cilët duhet të ndërtojnë marrëdhënie miqësie e bashkëpunimi me të gjitha vendet e Ballkanit.
Mesazhi drejtuar Metës:
“Gjatë kësaj kohe, kur populizmi dhe nacionalizmi janë në rritje, rajoni ynë ka nevojë për udhëheqës të cilët do të ndërtojnë marrëdhënie të forta miqësie, bashkëpunimi dhe paqeje me të gjithë popujt në rajon.
Nuk mund të lejojmë që Ballkani të ‘ballkanizohet’ dhe duhet të shmangim çdo kthim në të kaluarën e tij të errët. E ardhmja e Shqipërisë nuk mund të jetë përveçse ajo evropiane. Dhe ju mund ta siguroni këtë. Ju dhe vendi juaj do të keni gjithmonë mbështetjen dhe miqësinë time. Urimet më të mira!
Përzemërsisht Dimitris Avramopoulos, Komisioneri i BE për Migrimin, Çështjet e Brendshme dhe Shtetësinë”.
