Avokati i Redjan Rrajës ka apeluar masën e sigurisë, dhe i ka kërkuar Gjykatës së Apelit për Krimet e Rënda ta lirojnë 34 vjeçarin. Avokati Besnik Çerekja deklaroi se “apelimin për shtetasin Redjan Rraja e nisa me postë këtë të dielë”.
34-vjeçari nga Nikla e Fushë-Krujës u arrestua si një nga autorët e dyshuar, në atentatin ndaj prokurorit të Durrësit, Arjan Ndoja. Pasi u zbulua nga gjurmët e gishtave. Ai u arrestua në Shkodër, në pikën kufitare, në tentativë për t’u larguar drejt Malit të Zi.
34-vjeçari Redjan Rraja u la nën masën e sigurisë “arrest me burg” nga Gjykata për Krimet e Rënda. Ky i fundit i ka mohuar akuzat, ndërkohë që policia po kërkon edhe dy persona të tjerë.
Ai u kap nga policia, pasi hetuesit kanë gjetur prova të mjaftueshme që implikojne Rrajën në atentatin ndaj prokurorit Ndoja, në Shkozet të Durrësit.
