Institucioni i Avokatit të Popullit në Kosovë ka paditur Komisionin Qendror të Zgjedhjeve për mospërfaqësim të barabartë të grave në listat zgjedhore për zgjedhjet parlamentare që pritet të mbahen më 6 tetor. Avokati i Popullit ka paraqitur padi në Gjykatën Themelore në Prishtinë, me kërkesë për masë të përkohshme lidhur me shkelje nga KQZ-ja të së drejtës për trajtim të barabartë të grave në të drejtat zgjedhore dhe të pjesëmarrjes. Ligji për Barazi Gjinore saktëson se duhet të ketë një përfaqësim 50 përqind për secilën gjini.
Partitë politike në Kosovë kanë përmbushur vetëm kuotën prej 30 përqind të përfaqësimit të grave në listat për kandidate për deputete, por jo përfaqësimin 50 përqind për secilën gjini. Partitë politike nuk kanë respektuar këtë ligj dhe në listat e tyre nuk kanë më shumë se 34 gra të përfshira. Lista e Lidhjes Demokratike të Kosovës, të cilës i prin kandidatja për kryeministre Vjosa Osmani, ka vetëm 33 gra; lista e Partisë Demokratike të Kosovës ka vetëm 33 gra dhe po kaq edhe lista e koalicionit Nisma-AKR-PD. Ndërsa Lëvizja Vetëvendosje dhe koalicioni AAK-PSD kanë në listat e tyre nga 34 gra.
