Autoriteti për Informim mbi Dokumentet e ish-Sigurimit të Shtetit ka reaguar lidhur me akuzat e deputetit demokrat Gent Strazimiri. Ky i fundit deklaroi se Vettingu në Policinë e Shtetit është ndërprerë pas verifikimit se 534 drejtues të lartë të Policisë së Shtetit kanë patur lidhje me Sigurimin e Shtetit.
Autoriteti për Informim sqaron në reagim se procedurat e vlerësimit janë kryer sipas cilësive profesionale të kandidatëve dhe rezultatet e verifikimit për çdo rast i janë komunikuar institucioneve përkatëse.
“Autoriteti do të kryejë procesin e verifikimit të figurës së çdo punonjësi që i nënshtrohet kontrollit, konkretisht nëse ka qenë person në ndjekje për spiunazh apo terrorizëm, anëtar, bashkëpunëtor ose i favorizuar nga ish-Sigurimi i Shtetit para vitit 1990, sipas ligjit për të drejtën e informimit me dokumentet e ish-Sigurimit të Shtetit të Republikës Popullore Socialiste të Shqipërisë”, thuhet në reagim.
Deputeti demokrat, Gent Strazimiri akuzoi Ministrinë e Brendshme se po mban të fshehtë skandalin që konfirmon drejtimin e Policisë së Shtetit nga vegla gjakatare e diktaturës.
