Emiliano Sala, sulmuesi i pafat i Argjentinës, i cili ra në Kanalin Anglez më 21 janar, ndërkohë që po fluturonte nga Nantes në Cardiff, vdiq si pasojë e “plagëve në kokë dhe në gjoks” dhe pasi trupi i tij u tërhoq nga avioni më 4 shkurt, u identifikua vetëm falë gjurmëve të gishtërinjve.
Këtë gjë e zbuloi autopsia pas një hetimi për vdekjen e tij. Një raport i plotë i degës së Hetimeve Ajrore nuk do të publikohet për një periudhë prej 6 deri në 12 muaj, por një raport paraprak duhet të dorëzohet brenda dy javësh.
Ndërkohë, nuk gjen paqe familja e David Ibbotson, pilotit që drejtonte Piper N264DB Malibu që ra në Kanalin Anglez.
Vajza Danielle tha për “Good Morning Britain” se familja ka mbledhur deri tani 140,000 sterlina për të financuar një operacion kërkimi që do të kushtojë më shumë se dyfishi i kësaj shume.
“Nëse ke shpresë, nuk duhet të dorëzohesh – tha ajo – Ai nuk do të ndalte së më kërkuari”.
Edhe bashkëshortja e pilotit kërkon trupin e tij. “Ne e dimë se ai ka ikur, por e duam mbrapsht. E dimë që ka vdekur por e duam në shtëpi”, ishte apeli i gruas së tij Nora.
“Ai ishte një bashkëshort i shkëlqyer, gjithmonë na ka mbështetur dhe ishte shkëmbi ynë. Na duket sikur ai sapo doli vetëm në këtë moment. E di se kushtet e motit nuk janë më të mirat dhe deti është i rrezikshëm, por ne kemi nevojë për një vështrim të fundit”, tha gruaja e pilotit të Sala.
