Ministria e Punëve të Jashtme e Kosovës ka reaguar pas sulmit që iu bë një autobusi me pasagjerë kosovarë mbrëmë në Serbi. Në një reagim publik, MPJ dënon ngjarjen e rëndë të cilën e përshkruan si të papranueshme. Madje, ajo shton se Bashkimi Evropian duhet të reagojë për ngjarjen në fjalë.
“Pengimi i automjeteve dhe gjuajtja e tyre me gjëra të ngurta rrezikojnë jetën e udhëtarëve. Presim, që organet e rendit, në këtë rast, në Serbi do të marrin masa sipas Ligjit kundër autorëve të këtij delikti. Shtetasit e Republikës së Kosovës si ata të Serbisë duhet të lëvizin lirshëm, pa frikë, kudo qofshin ata. Lëvizja e lirë e pa pengesë është parim themelor i BE-së dhe përkushtim i deklaruar institucional nga përfaqësuesit e shtetit fqinj për normalizim të plotë të marrëdhënieve në mes dy shteteve të pavarura dhe sovrane”, thuhet në reagimin e MPJ-së.
