Në Austri konservatorët kanë arritur marrëveshjen për koalicion qeverisës me Partinë e Lirisë, e cila është kundër imigrimit. Austria është i vetmi vend në Evropën Perëndimore, me një parti të ekstremit të djathtë në qeveri.
Sebastian Kurz, 31 vjeçar, lideri i Partisë Popullore Austriake konservatore, do të jetë kryeministri më i ri në Evropë, pasi partia e tij doli fituese e zgjedhjeve të mbajtura më 15 tetor.
Kurz dhe lideri i Partisë së Lirisë, Heinz-Christian Strache, kanë shpallur mbrëmë se e kanë arritur një marrëveshje për koalicion qeverisës.
Partia Popullore Austriake i fitoi zgjedhjet duke mbajtur linjë të fortë për çështjen e imigrimit, që shpeshherë përputhej me qëndrimin e Partisë së Lirisë, e cila në zgjedhje doli e treta.
