Austria do të ndihmojë shtetin shqiptar për të përballuar pasojat e shkaktuara nga tërmeti i 26 nëntorit, duke ofruara 600 mijë euro për rindërtimin e banesave.
Marrëveshja për dhurimin e kësaj shume u nënshkrua në Ministrinë e Mbrojtjes nga drejtori i Agjencisë Kombëtare të Mbrojtjes Civile, Haki Çako dhe drejtoresha e zyrës lokale të Agjencisë Austriake për Zhvillim, Simone Ungersböck.
Firmosja e kësaj marrëveshje ka për qëllim përmirësimin e kushteve të jetesës për familjet e prekura nga tërmeti. Përfituesit kryesorë të këtij donacioni do të jenë kryesisht bashkitë e Durrësit dhe të Tiranës.
Agjencia Austriake për Zhvillim do të monitorojë gjithë procesin e zbatimit të këtij projekti, si dhe do të informohet në mënyrë të vazhdueshme për ecurinë e këtij projekti.
Projekti ka hyrë në fuqi më datë 01 dhjetor 2019 dhe do të vazhdojë deri më 31 mars 2021.
