Autoritetet australiane kanë arrestuar një person në Sidnei, i cili vepronte si agjent ekonomik i regjimit të Koresë së Veriut. Sipas autoriteteve australiane, i arrestuari është Chan Han Choi, 59 vjeç, që mendohet se po organizonte eksporte ilegale nga Koreja dhe po përpiqej që të shiste armë të shkatërrimit në masë.
Agjenti koreanoverior,akuzohet për shkeljen e ligjeve australiane si dhe për cënimin e sanksioneve australiane dhe Organizatës së Kombeve të Bashkuara. Choi është shtetas australian me origjinë koreane dhe jeton në Australi prej 30 vitesh.Ky rast është i pari për autoritetet australiane, ndërsa janë siguruar edhe prova të shkëmbimit të të arrestuarit me përfaqësues të shtetit komunist në Korenë e Veriut. Hetuesit australianë pretendojnë se Chan, po përpiqej të shiste shërbime dhe pajisje të teknologjisë së raketave balistike për të krijuar të ardhura për regjimin koreano verior.
Gjithashtu ai kishte organizuar shitjen e qymyrit nga Koreja e Veriut në Vietnam dhe Indonezi. Policia tha se i dyshuari është një agjent besnik i regjimit koreanoverior dhe se beson që po i shërben një qëllimi të lartë patriotik. Autoritetet gjithashtu sqaruan se veprimet e tij nuk përbënin asnjë kërcënim të drejtpërdrejte për australianët, dhe se tregtia e diskutuar e armëve nuk kishte mbërritur kurrë në brigjet e këtij vendi.
