Talente të shumtë rriten në vende të ndryshme edhe pse me orgjinë janë nga vende të tjera. Kjo bën që ata të dyzohen kur vjen momenti për të zgjedhur ekipin kombëtar, pasi marrin ftesa nga shtete të ndryshme. Në të tilla raste ka ndodhur edhe më ekstremi, ku dy vëllezër luajnë për kombëtare të ndryshme, si në rastin e vëllezërve shqiptar Xhaka, apo të atyre Boateng.
Por ka pasur edhe raste të tjera mjaft të çuditshme, ku kanë ndryshuar mendje në momentin e fundit. Më shumë bujë vitet e fundit ka bërë rasti i Digo Costa-s. Futbollisti i Atletico Mardid në vitin 2014 zgjodhi që të luante për Spanjën dhe jo më për Brazilin. Këta të fundit ishin në një situatë mjaft të vështirë në sulm dhe Costa kishte qenë pjesë e tyre në dy miqësore, por në fund vendosi të luante për Spanjën.
Për këtë çështje delikate ka folur së fundmi sulmuesi i transferuar te Arsenal, Pierre Emerick-Aubameyang. 28-vjeçari ka patur mundësinë të luajë për Spanjën dhe Francën (ka zhvilluar ndeshje të U-21), por në fund ka zgjedhur të përfaqësoje Gabonin, vendin e origjinës së tij.
Në një intervistë për sajtin e klubit anglez Aubameyang është shprehur: “Kam qenë shumë i ri kur kam zgjedhur se për cilin vend do të luajë. Lojtarët marrin kohën e tyre për të konsideruar ofertat dhe bërë zgjedhjen e duhur, por për mua zgjedhja ka qenë e qartë.
“Doja të ndiqja gjurmët e babait tim. Ai ka qenë kapiteni i kombëtares së Gabonit në të shkuarën. Shumë mirë mund të kisha zgjedhur të luaja për Spanjën ose Francen. Kam luajtur me ekipin U-21 të Francës, por e kuptova shumë shpejt se në zemrën time ishte dëshira për të imituar babain tim.”
