Greqia nuk heq dorë nga kërkesat e saj sa i përket të drejtave të minoritetit grek në Shqipëri. Kërkesat e saj i ka kthyer në formë ultimatumi dhe kërcënuese duke kushtëzuar Shqipërinë me veton sa i përket procesit të integrimit në Bashkimin Evropian.
Ultimatumet i kanë rreshtuar njëri pas tjetrit zyrtarët grekë përgjatë kohëve të fundit. Kësaj radhe ka qenë vetë Presidenti Prokopis Pavlopoulos i cili në një intervistë për të përditshmen serbe “Politica”, thekson se veprimet e autoriteteve shqiptare që shkelin të drejtat themelore të njeriut, pengojnë rrugën drejt anëtarësimit në Bashkimin Evropian.
“Kur bëjnë akte që bien në kundërshtim me konventat evropiane, të tilla si shkelja brutale e të drejtave themelore të njeriut, në veçanti ajo e pronës, minon perspektivën evropiane”, është shprehur kreu i shtetit grek, të cilit i referohen edhe mediat i këtij vendi.
Më herët, edhe ministri i Jashtëm grek, Nikos Kotzias ka kërcënuar Shqipërinë me bllokim të hapjes së negociatave për integrimin në BE, në rast se nuk respekton të drejtat e minoritetit grek në Himarë. Sipas tij, minoritetit grek në Shqipëri duhet t’i njihet ky status kudo që ai jeton dhe jo vetëm në dy zonat e jugut të vendit, që janë përcaktuar zyrtarisht që në kohën e regjimit komunist./Tirana Today
