Melvi Disha, shoku i të njerit Emiljano Boçi, i cili u plagos në shpatull natën e atentatit, është marrë në pyetje nga policia në ambientet e spitalit të Traumës, aty ku dhe po merr mjekim.
Melvi Disha ndodhej në makinë bashkë me 32-vjeçarin dhe një vajzë natën e vrasjes. Kjo e fundit mendohet se ishte e dashura e Boçit dhe i shpëtoi për mrekulli atentatit ë ndodhur në zonën e ish-Parkut të Autobusëve në kryeqytet.
27-vjeçari Disha ka dëshmuar se nuk ka arritur të shquajë personin që ka qëlluar, pasi është detyruar të shtrihet në sedilje për të mbrojtur veten:
“Pasi dolëm nga lokali u drejtuam drejt makinës dhe nuk pamë asgjë te pazakontë. U ula te sedilja e pasme pas shoferit. Sapo u futëm në makinë na qëlluan. Kur më preku plumbi jam shtrirë në sedile dhe kam mundur të lëviz vetëm disa minuta pasi përfunduan të shtënat. Nuk e kam idenë kush mund të jetë autori”.
As vajza e ndodhur në makinë në momentin e ngjarjes nuk ka mundur të japë shumë detaje. Në polici vajza ka dëshmuar se nuk ka parë shumë gjëra, por ka mundur të vërejë një person që u afrua nga dera e shoferit dhe ka qëlluar disa herë në drejtim të tij, raporton BalkanËeb.
Ka qenë pikërisht vajza ajo e cila ka njoftuar policinë, e cila ka dëshmuar se pas ngjarjes, autorët janë larguar përmes pallateve të lagjes “Shefqet Musaraj”.
