Ish-polici Arben Bilali, të cilit i bënë atentat mesditës e së mërkurës në Tiranë, kishte kërkuar ndihmë në Komitetin Shqiptar të Pajtimit. Kreu i këtij komiteti, Gjin Marku, ka rrëfyer në një intervistë për “Gazeta Shqiptare”, se si është takuar me familjen Bilali, ku i kishin kërkuar ndihmë.
“E njoh familjen fatkeqe, dhe e di se ata janë përfshirë në disa ngjarje tragjike, ku policia nuk ka mundur të identifikojë autorët. I shpreh keqardhjen dhe ngushëllimet më të thella familjes Bilali, e cila ka ngritur shqetësimin edhe para zyrës sonë, por pa identifikuar autorët. Pa identifikimin e autorëve, për ne ka qenë e vështirë të bëjmë hapa për pajtimin e e sqarimin e situatave që kanë çuar në vrasjen e vëllezërve Bilali”, ka thënë Marku.
Më tej ai tregon edhe zonat më tipike të Tiranës, në raste ngujimi. Sipas tij, problemi i tokave dhe krimi i organizuar janë ende prezentë.
“Zonat më tipike me mbajtje familjesh në gjakmarrje janë Kombinati, Yzberishti, Selita dhe Kamza. Problemi i tokave dhe krimi i organizuar në këto zona është më i dukshëm, për të sjellë pasojat e vrasjeve dhe të hasmërisë”, shprehet ai.
