Detaje të reja kanë dalë në dritë lidhur me atentatin në Laprakë, ku humbi jetën 17-vjeçarja Briselda Gjinkola, e ndërsa mbeti i plagosur i dashuri i saj 23-vjeçar Erion Benga. Mësohet se të rinjtë kishin vetëm një javë që ishin lidhur.
E ndjera i kishte dhënë fund lidhjes me një djalë tjetër, i cili është gjithashtu i përfshirë në hetimin e policisë, para të lidhej me Bengan.
Atentati ndaj tyre ndodhi pasditen e së mërkurës në Laprakë, në kohën kur çifti i të rinjve kanë lënë ambientet e një lokali. Pasi kanë hipur në mjetin tip “Benz”, janë qëlluar 5 herë me pistoletë nga një person.
Hetimet kanë zbuluar se 10 ditë më parë, autori i krimit, një 19-vjeçar, ishte konfliktuar me Erion Bengon, për shkak se kishte ngacmuar 17-vjeçaren dhe Benga e kishte qëlluar me shuplakë.
Objektiv i atentatit ka qenë 23 -vjeçari Benga që mbeti i plagosur bashkë me të dashurën e tij. Edhe pse i qëlluar me plumba në qafë e në shpatull, Benga ka mundur ta transportojë vetë të dashurën e tij në spital, ku ajo humbi jetën. Vetë Erion Benga është jashtë rrezikut për jetën.
