Policia ka identifikuar dy autorët e vrasjes së dy kushërinjve mbrëmjen e djeshme në Laç, ndërsa ata tashmë janë shpallur në kërkim.
Në kërkim janë shpallur dy persona, të identifikuar si Markel Gjonbushi dhe Vincens Pali (Bushi).
Pas ekzekutimit të dy kushërinjve, policia shoqëroi mbi 10 persona, mes të cilëve dëshmitarë okularë të ngjarjes dhe persona që mund të kishin dijeni për atë që ka ndodhur, të cilët pas marrjes në pyetje janë lënë të lirë.
Viktimat janë Mikel Jushi, 35 vjeç, dhe Jani Jushi, 30 vjeç. Dy të rinjtë, djem xhaxhallarësh, janë qëlluar nga dy persona. Nga hetimet e para dyshohet se konflikti mes viktimave dhe autorëve ka nisur brenda në lokal, për shkaqe që ende nuk dihen.
Pas konfliktit, dy viktimat janë përpjekur që të largohen, sepse kanë parë që një prej personave me të cilët janë konfliktuar, ka nxjerrë armën. Autori i ka ndjekur nga pas dhe pavarësisht se janë përpjekur që të fshihen në një rrugicë, nuk kanë arritur t’u shpëtojnë plumbave të pistoletës.
35-vjeçari Mikel Jushi mësohet se është pronar i një lokali në qendër të Laçit, ndërsa viktima tjetër është djali i xhaxhait të tij. Të dy këta persona, pak pas ngjarjes u dërguan me urgjencë drejt Spitalit të Traumës në Tiranë, pasi gjendja e tyre paraqitej e rëndë. Ende pa mbërritur në spital për ndihmë mjekësore, ata kanë ndërruar jetë për shkak të plumbave që morën në atentat.
Vrasja e dyfishtë në Laç/ Kushërinjtë ikën me vrap, autorët i ndoqën dhe i qëlluan
