Atalanta kërkon ta bëjë përfundimisht të sajin, portierin e Kombëtares shqiptare, Etrit Berisha. Skuadra, tek e cila lojtari kuqezi është duke luajtur aktualisht po shqyrton mundësinë e blerjes përfundimtare të kartonit të tij. Klubi bergamask është i kënaqur me paraqitjen e portierit të cilin e huazua nga Lazio në fillim të sezonit.
Mirëpo, bisedimet në ditët e fundit janë vështirësuar jo pak, pasi presidenti i Lazios, Lotito, kërkon të përfitojë nga shitja e Berishës për të mbërritur te sulmuesi i ri i Atalantës Petagna. Çmimi i e kartonit të 28-vjeçarit kuqezi është fiksuar në 5 milionë euro, ndërkohë që numri një i klubit bardhekaltër ofron përveç Berishës edhe 7 milionë euro për të siguruar shërbimet e sulmuesit që është grumbulluar nga Ventura në kombëtaren italiane. Sido që të mbyllen bisedimet, e ardhmja e Berishës duket se do të vijojë të jetë në Bergamo, ku sezonin e ardhshëm do të luajë edhe në Europa League, transmeton Supersport.
Berisha ka meritë të veçantë në formën që tregoi Atalanta në këtë sezon teksa siguroi vendin e pestë. Ka zhvilluar në total 26 ndeshje në Serinë A dhe 1 në Kupën e Italisë dhe gjithmonë është vlerësuar pozitivisht për paraqitjet e tij. Bergamaskët kanë fituar siguri me Berishën në portë, ndaj do të përdorin të gjitha kartat për ta blerë nga Lazio, ku po gjatë këtij sezoni shpërtheu një tjetër, shqiptar, Thomas Strakosha.
