Astrit Patozi ka deklaruar në një intervistë se ka një alternativë të brendshme në PD, e cila e bën partinë më përfaqësuese.
I ftuar në Top Story, Patozi tha se kundërshtarët e Bashës janë shumë më tepër se kundërshtarët e përjashtuar nga lista për deputetë:
“Unë bashkë me kundërshtarët e Lulzim Bashës dhe këtë fluks demokratësh jemi shumë më tepër sesa të përjashtuarit nga lista për deputetë. Kush hap debatin e listës do ta fshehë problemin”, deklaroi ai.
Teksa u shpreh se alternativa Basha është e dështuar, Patozit tha përçarja e partisë shmanget duke njohur kritikët si alternativë dhe testimi i kësaj alternative:
“Që ne të vazhdojmë bashkë, që kjo parti të mos shkërmoqet, duhet që Basha ta njohë si alternativë dhe ta njohë sesa vlen. Ne mendojmë se sot jemi shumica, mund të jemi gabim, por duhet të provohet. Por, alternativa ‘Basha’ është e dështuar dhe kjo është e provuar”.
Gjithashtu, ish-deputeti i PD-së deklaroi se ish-kryeministri tha në intervistën e para pak ditëve disa të vërteta që duhet t’i kishte thënë më parë.
“Në atë intervistë u thanë disa të vërteta. Por këto të vërteta duhet të ishin thënë më parë.
Për çfarë ka vlerë kjo intervistë? Së pari Basha dhe lideri i PD-së Sali Berisha, është se të dy ata pranojnë faktin se PD është në krizë përfaqësimi. Kjo sepse ata që janë aty janë përfaqësues së Bashës. Kjo është ajo që duhet diskutuar. Diskutimi për listën Basha kishte vlerë për aq kohë sa ajo u zgjedh dhe shkoi në zgjedhje. Në çastin që kjo listë u votua ky debat u mbyll. Nëse PD do të fitonte zgjedhjet në atë listë unë do t’i shtrëngoja dorën Bashës.”
