Asllan Rusi, ishte një nga volejbollistët më të talentuar në vend. I aktivizuar me klubin e Dinamos, dhe nën drejtimin e mjeshtrit Vangjel Koja, ai do të shpallej disa herë kampion kombëtar. Ndërsa do të shkëlqente edhe në shumë ndeshje ndërkombëtare. Por karriera e tij, do të ndërpritej tragjikisht më 1975. Shkak u bë dashuria e tij me vajzën e diktatorit, Pranvera Hoxhën, e cila stërvitej për t’u bërë volejbolliste.
Siç e pranon edhe nusja e djalit të vogël të udhëheqësit komunist, Liljana Hoxha, kjo lidhje shkaktoi shqetësim në familjen Hoxha. Pranvera u hoq menjëherë nga skuadra. Por Asllan Rusi nuk hoqi dorë. Tentoi ta takonte, sa herë që e ndeshte në rrugë.
Në këto kushte, regjimi veproi me dorë të hekurt. Asllanin e largojnë nga skuadra e Dinamos, ndërsa pak më vonë arrestohet nga Sigurimi i Shtetit, dhe mbyllet me forcë në Spitalin Psikiatrik në Tiranës.
Pas daljes prej andej, nuk do të ishte më kurrë i njëjti. Nisi punë si mësues i fizkulturës në liceun artistik “Jordan Misja” në Tiranë. Vdes në vitin 1983, në moshën 39-vjeçare, për shkak të një tumori në lëkurë.
