Partizani hedh kandidaturën seriozisht për tu shpallur kampion i këtij sezoni në Superligë. Të besuarit e Skënder Gegës kanë zhvilluar një ndeshje fantastike përballë Teutës të cilën e kanë mposhtur me rezultatin e thellë 3-0. Që nga ndeshja e parë përballë Skënderbeut, që e nisën me humbje të kuqtë kanë pasur një ecuri mjaft pozitive, duke mos pësuar asnjë gol. “Demat”, në fakt, kanë marrë pesë fitore dhe një barazim në Kategorinë Superiore që nga ajo sfidë.
Ishte Asani protagonist kryesor në këtë ndeshje, pasi ka shënuar dy gola mjaft të bukur. 23-vjeçari zhbllokoi ndeshjen në minutën e 2’, pas një goditje dënimi e ndihmuar edhe nga një devijim i murit mbrojtës.
Ndërsa në minutën e 42’ shënohet edhe goli që sjell sigurinë tek Partizan, nga i njëjti autor. Pas një topi të rikuperuar nga ‘Demat’ është sërish Asani që hapet në të djathtë dhe gjuan mjaft bukur topin i cili përfundon në rrjetë.
Në pjesën e dytë ka ardhur edhe goli i tretë për vendasit, të cilët kanë shënuar me Mensah në të 82-ën. Kështu, Partizani ka marrë fitoren e tretë radhazi në kampionat dhe falë këtyre tri pikëve kryeson renditjen me 16 pikë, 3 më shumë se Kukësi i vendit të dytë, që do të luajë nesër në fushën e Skënderbeut. Ndërkohë, kjo ka qenë humbja e tretë në kampionat për Teutën, që mban vendin e shtatë me 8 pikë pas shtatë javëve të para.
