Kryeministri Edi Rama, ashtu si në fushatë, theksoi sërish gjatë fjalës së tij në Asamblenë e PS-së, se kjo parti do të jetë në koalicion me qytetarët në 4 vitet e ardhshme.
Rama e quajti mandatin e fituar një mundësi të artë për të ripërtërirë dhe përmirësuar Partinë Socialiste. Kryeministri shtoi se pushtetin do e ndajnë me njerëzit e thjeshtë, ndërsa nuk la pa përmendur forcat e tjera politike.
“Ky është mandati më i vështirë që kur unë jam në këtë detyrë”, tha ndër të tjera, teksa theksoi se PS ka fituar një mandat kuq e zi.
FJALA E RAMËS:
PS bashkëkoalicion me njerëzit e zakonshëm të këtij vendi. Bashkëqeverisja me njerëzit e zakonshëm është një sfidë reale për të ndërtuar dhe vënë në funksionim një koalicion real, të cilin në 2 vite do ta shtrijmë edhe në nivelin vendor.
Ky proces është baraz me krijimin një force të re politike. Jemi në fillesën e një projekti të ri politik. Shqipërisë duhet t’ia japim forcën e re politike që ka ardhur nga nevoja e vendit dhe njëkohësisht e jona për të çuar në një stad të ri shtetin me punë dhe mirëqenie. Urgjenca e ndryshimit është ajo që u mishërua si një motivim popullor për t’na i larguar nga prehri aleatët dhe u materializua si një shumicë popullore nën flamurin kuq e zi.
Urgjenca është ajo që na motivon të udhëheqim pavarësisht kusureve tonë në 4 vitet e para. Urgjenca e ndryshimit është ajo që i mundi të gjithë ata që u bënë bashkë për të në ndërprerë misionin tonë për të bërë shtet. Njerëzit e zakonshëm e bënë këtë, ata e fituan betejën njerëzore. Është radha jonë të bëjmë tonën për ata. Besojeni ose jo ky është mandati më i vështirë që kur unë jam në këtë detyrë. Për t’ia dalë këtij mandati kaq të vështirë, duhet supermotivim.
Dëgjojeni mirë këtë bindje, fitorja e 25 qershorit mund të jetë për ne e parë ose e fundit për një kohë të gjatë. Ne do ta mbrojmë këtë pushtet nga vetvetja, do ta ndajmë me njerëzit e zakonshëm pushtetin dhe do bashkojmë forcën tonë udhëheqëse me hallet e tyre. Pesha e madhe që na është besuar është mundësia jonë unikale për të ripërtërire lëvizjen, për të transformuar partinë.
Larg qoftë që të na ndodhë siç u ndodhi tjerëve, ne kërkuam një mandat kuq e zi dhe morëm një mandat kuq e zi. Një mandat për t’u ngritur mbi vetveten dhe kundër gjithçkaje që na ndan nga realiteti, nga ëndrrat, nga shpresat. Duhet ta besoni që është e artë kjo mundësi që kemi për të ndërtuar bashkë me njerëzit një forcë qeverisëse të vendit./ Tirana Today
