Akademiku Artan Fuga e ka cilësuar platformën e McAllister si një dhuratë e Zotit që risjell një të mirë të refuzuar.
Me anë të një postimi në Facebook, Fuga i jep një këshillë Bashës, duke i thënë “të mos e lërë trenin t’i ikë dy herë”, ndërsa shton se nuk mund ta hedhë në kosh propozimin amerikan.
Më poshtë postimi i plotë i Fugës në Facebook:
Cfarë do të bëjë Lulzim Basha me propozimin amerikan, një dhuratë e Zotit për çadrën.
———————————
Disa zëra të opinionit publik që nuk kanë lënë baltë pa hedhur mbi kurrizin dhe kokën e Lulzim Bashës, e drejta e tyre në një demokraci, për të cilën ai nuk ka nevojë sigurisht për avokat, tani po e këshillojnë të “bëhet burrë”, ta cojë deri në fund atë që ka nisur, të mos pranojë as të punojë mbi platformën McAllister, që zyrtari i lartë amerikan i ofroi mbështetje bujare për ta realizuar deri në një duke e cuar më përpara atë.
Sigurisht z. Lulzim Basha bën si të dojë, ai i di vetë punët e tij, por propozimin e drejtë amerikan nuk mund ta hedhi në kosh dhe të dëgjojë baltosës të tij që në të drejtë të tyre janë kundërshtarë të ideve që ai po çpalos në çadër dhe sigurisht një pjesë janë të renditur me kampin politik që natyrshëm dëshiron ta diskreditojë atë.
Nuk është fare puna se është një propozim amerikan, por është dhuratë e Zotit që risjell një të mirë të refuzuar.
Mos e lër trenin të të iki dy herë!
Kur miku im Muç Nano, por jo bashkëmenduesi im, i thotë mos e prano propozimin amerikan, besoj se Lulzim Basha, bartësi i shpresës së republikës së re, besoj se e kupton se çfarë duhet të bëjë!
Lulzim Basha e mori si buldozer përpara jetën politike të Shqipërisë, kundërshtarët e tij në kampin tjetër dhe brenda partisë së tij, kapërceu ylberin duke bërë të pamundurën dhe tani ta lëri trenin të iki!
Ka mundësi të marri ato që dëshironte për zgjedhje të lira ku qytetarët të votojnë cilin duan, republikan, socialist, demokrat, grek, çam, komunist, cilin t’u dojë qefi!
Dhe t’i lëri pa marrë!
Do isha habitur pa masë!
Sipas mendimit tim modest, jo vetëm që nuk është braktisje e çështjes që ai prej muajsh artikulon me të drejtë në çadër dhe unë e kam mbështetur sinqerisht, jo për interesat e mia, por sepse është pikërisht rruga e suksesit që çadra ka pritur.
Eshtë fitore jo disfata e qytetarëve anëembanë Shqipërisë!
I dëgjon njeri ata apo jo?
Mbase e kam gabim, por e kisha për detyrë ta ndaja me ju miq virtualë e realë.
