Prokurorja e Përgjithshme, Arta Marku ka pohuar sot se qyteti i Elbasanit është një pikë e nxehtë e grupeve kriminale tashmë të sofistikuara, teksa ka udhëzuar prokurorët për të bashkëpunuar me Policinë e Shtetit dhe për identifikuar pikat e dobëta për identifikimin e autorëve.
Marku i bëri këto deklarata teksa zhvilloi një takim me prokurorët, pas ceremonisë së përurimit të ndërtesës së re të Prokurorisë në Elbasan.
“Elbasani rezulton pikë e nxehtë e grupeve kriminale tashmë të sofistikuar, moderuar dhe prezente në jetën publike të qytetit duke investuar në tregun privat dhe punët publike.
Prokurorët në bashkëpunim me Policinë e Shtetit duhet të bëjnë analiza të përbashkëta në lidhje me çështjet e pezulluara, të identifikojnë pikat e dobëta të tyre, veprimet që mund të çojnë në identifikimin e autorëve dhe të rifillojnë hetimet duke shtuar kapacitetet profesionale në funksion të zbulimit dhe ndëshkimit të autorëve”, tha Kryeprokurorja Marku.
