Prokurorja e Përgjithshme, Arta Marku, që prej marrjes së detyrës mes tymnajës në Kuvend, ka nisur “pastrimin” e institucionit që ajo drejton.
Pas një sërë takimesh, Arta Marku shkarkoi nga detyra Rovena Gashin, drejtore e njësisë së dekriminalizimit dhe zyrën e marrëdhënieve me Jashtë në Prokurorinë e Përgjithshme.
Në vend të Gashit, Marku emëroi Arqile Koçin, një prej kandidatëve për Prokuror të Përkohshëm të Përgjithshëm.
Tashmë, Marku ka bërë një tjetër lëvizje: ajo ka ndërprerë marrëdhëniet e punës me këshilltarin për mediet, Albi Seranin, i cili e kryente këtë detyrë prej 5 vitesh.
‘Hashtag.al’ mëson se ka qenë Marku që ka vendosur ndërprerjen e marrëdhënies së punës me Seranin, ndërsa nuk ka detaje se cili mund të jetë i përzgjedhuri i Markut.
Serani, pak minuta më parë u ka dërguar të gjithë bashkëpunëtorëve të tij një mesazh, duke u shkruar:
‘Të nderuar kolegë!
Gjatë 5 viteve të fundit kam pasur kënaqësinë të bashkëpunoj me Ju. Për mua personalisht, kjo periudhë ka qenë shumë intensive dhe më ka ndihmuar shumë në aspektin profesional.
Unë ndihem shumë i nderuar për raportet e krijuara me gjithësecilin prej Jush dhe shpresoj që rrugët tona të bashkohen sërish, gjithnjë për të ruajtur miqësinë dhe komunikimin korrekt që kemi zhvilluar deri më tani.
Duke Ju uruar të gjithë Vit të Ri të mbarë dhe sa më shumë fat, Ju njoftoj që, duke filluar nga dita e sotme, unë nuk do të jem më pjesë e Prokurorisë së Përgjithshme.
Ju faleminderit për gjithçka!’
