Ish-ministrja e Jashtme Arta Dade ka kritikuar publikisht kryeministrin Rama lidhur me çështjen e shumë përfolur “Cakaj”.
E ftuar në emisionin “A Show” të Adi Krastës, Dade tha se kryeministri krijoi një ‘luftë’ të panevojshme me institucionin e Presidencës, ndërsa shtoi se ishte habitur nga reagimi i Ramës pas refuzimit të dekretimit nga Meta.
“Ajo që më ka befasuar është pse kryeministri ka bërë gjithë këtë luftë, me një gjuhë të papranueshme institucionale. Nuk e ka bërë edhe kur na kanë sulmuar, dhe si ka mundësi që të krijohet gjithë ky problem serioz me Presidencën”, u shpreh ajo.
Vetë Dade shprehet kundër emrit të Cakajt për ministër të Jashtëm, pasi argumentoi se ky i fundit nuk njeh procesin tonë dhe s’mund të jetë kryenegociator. Më tej, ish-ministrja tha se Cakaj nuk është kandidaturë e Partisë Socialiste, por vjen nga oborri i kryeministrit Rama.
“Sinqerisht nuk e kam njohur atë djalë, kur filloi të bëhej element i medias fillova të kërkoj CV –në e tij dhe nuk e dija që ishte zv.ministër i Jashtëm. Dhe ai nuk duhet të jetë edhe kryenegociator. Përtej faktit që ai është i lexuar, nuk njeh procesin tonë. Mbase të isha unë në vend në Bushatit, nuk do ta lija si krye negociator. Fakti që është nga Kosova, ishin ekzagjerime. Mua më vjen keq, por përderisa është kaq i mirë pse nuk ia çojmë Kosovës. Kosova ka nevojë për të tilla potenciale”, tha ajo, duke kritikuar më tej Partinë Socialiste që sipas saj, duhet të riorganizohet:
“PS duhet të riorganizohet. Më vjen keq për kreun e grupit parlamentar të PS, Taulant Balla që tha sot Gent Cakaj është kandidature e PS dhe prandaj është emëruar për ministër të jashtëm. Ai nuk është kandidaturë e PS, por nga oborri i Ramës. Unë nuk jam në Kuvend prej disa kohësh, por marr pjesë në konferenca. Të heshtësh do të thotë të mos bësh detyrën ndaj vendit. Nuk do hesht më,”- tha Dade.
