Arsenal nuk ka ditur të shfrytëzojë epërsinë numerike për një pjesë të madhe të ndeshjes përballë Atletico Madridid dhe gjysmëfinalja e parë e Europa League është mbyllur 1-1 në “Emirates”. Mbrojtësi i djathtë Vrsaljko brenda tetë minutave ka bërë dy ndërhyrje të pakuptimta duke vendosur në një pozitë shumë të vështirë ekipin e tij. Vetëm pak minuta pas kartonit të kuq është përjashtuar nga stoli edhe trajneri i Atleticos, Diego Simeone për protesta.
Arsenal nga ky moment mori në dorë ndeshjen dhe kontrolloi në çdo moment topin, por gjatë gjithë pjesës së parë nuk arritën dot të shënonin edhe pse sulmet dhe rastet ishin të panumërta. Pas pushimit Arsenal më në fund arrin të thyejë murin e Godin me shokë duke gjetur golin e avantazhin me blerjen rekord të klubit Alexandre Lacazette.
Pritej një reagim nga madrilenët pas golit por nuk ndodhi. Ishin sërish londinezët që komandonin në fushë dhe kërkonin golin e dytë. Një kundërsulm pak minuta nga fundi barazoi gjithçka dhe Griezmann me shumë vështirësi dhe falë paaftësisë së mbrojtjes së Arsenal në atë moment e dërgon topin në rrjetë. 1-1 mbyllet ndeshja dhe gjithçka është e hapur për ndeshjen e kthimit në Spanjë.
Marseille ka marrë një fitore 2-0 në Stade Velodrome ndaj RB Salzburg duke hedhur një hap të rëndësishëm për në finalen e Europa League. Ishte Thauvin ai që ia lehtësoi ndeshjen ekipit të tij kur zhbllokoi rezultatin në minutën e 15’. Pas pushimit ishte N’Jie ai që dyfishoi rezultatin pas një tjetër pasimi të Dimitri Payet, i cili ishte padyshim lojtari më i mirë në fushë, një pikë referimi për ekipin e tij dhe një mendje kreative që mund të ndryshonte ndeshjen me një veprim. Francezët janë thuajse në finale, dhe mjafton të ruajnë rezultatin në ndeshjen e kthimit ndaj austriakëve.
