Gianni De Biasi do të jetë sërish protagonist në futbollin italian, por jo në stolin e ndonjë skuadre futbolli. Nga kjo fundjavë ai do të jetë pjesë e ekranit të televizorit, në emisionin e famshëm sportiv, “90 Minuto”. Ish-trajneri i përfaqësueses shqiptare është konfirmuar si ekspert në studio, ku emisioni do t’i kushtohet Serisë A dhe Serisë B.
Tekniku ka bërë të qartë pak kohë më parë se eksperienca në televizion ishte e rëndësishme për të dhe me sa duket, këtë vit do të kalojë kohën në studiot televizive të RAI2 ku transmetohet ky emision të dielave në darkë.
De Biasi që pas largimit nga Kombëtarja shqiptare nuk ka pasur sukses me skuadrat që ka drejtuar, pasi në Spanjë u shkarkua nga Alaves dhe në minutat e fundit dështoi edhe marrëveshja me Poloninë.
Jo rastësisht, në çdo studio televizive ai prezantohet gjithmonë si “ish-trajneri i kombëtares shqiptare” dhe eksperiencat personale të cilat tregon zakonisht, kanë lidhje me periudhën e tij kur drejtonte kuqezinjtë.
