Në sajë të operacionit të koduar “Account” është vënë në pranga një shtetas, si dhe janë proceduar dy të tjerë. Burime zyrtare të policisë njoftojnë se është bërë ndalimi i shtetasit Fatos Alimadhi, 54 vjeç, banues në Tiranë, për veprën penale “Shpërdorimi i detyrës”.
Fatos Alimadhi (vëllai i ish-deputetit Adriatik Alimadhi) akuzohet se së bashku me dy përmbarues të tjerë, kanë firmosur shkresa dhe vendime për sekuestro për bllokimin e llogarive rrjedhëse të një subjekti privat, pa e njoftuar këtë subjekt.
Po si ndodhi ngjarja? Një shtetas ka marrë kredi në emër të një subjekti, dhe pas disa kohësh ka ndërruar jetë. Sipas ligjit, në momentin që ndërron jetë personi që ka marrë kredinë, e mbulon siguracioni i jetës. Por përmbaruesi Fatos Alimadhi, vëllai i ish-deputetit Adriatik Alimadhi, i bllokoi llogaritë familjarëve të të ndjerit pa i lajmëruar.
Në të njëjtën kohë u proceduan penalisht në gjendje të lirë shtetasit S. D., dhe P. Q., me detyrë përmbarues privat, për veprën penale “Shpërdorimi i detyrës”. Lidhur me këtë rast, materialet hetimore i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
Njoftimi
Finalizohet me sukses operacioni policor i koduar “Account”.
Operacioni, i zhvilluar nga Sektori për Hetimin e Krimit Ekonomik dhe Financiar në DVP Tiranë.
Vihet në pranga 1 shtetas, për veprën penale “Shpërdorimi i detyrës”.
Procedohen penalisht 2 të tjerë.
Specialistët e Sektorit për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë, organizuan dhe finalizuan me sukses operacionin policor të koduar “Account”, si rezultat i të cilit u bë ndalimi i shtetasit F. A., 54 vjeç, banues në Tiranë, për veprën penale “Shpërdorimi i detyrës”.
Nga veprimet hetimore ka rezultuar se shtetasi F. A., gjatë ushtrimit të funksionit si përmbarues privat, duke shpërdoruar detyrën, ka firmosur shkresa dhe vendime për sekuestro për bllokimin e llogarive rrjedhëse të një subjekti privat, pa e njoftuar këtë subjekt.
Gjithashtu, në kuadër të këtij operacioni, u proceduan penalisht në gjendje të lirë shtetasit S. D., dhe P. Q., me detyrë përmbarues privat, për veprën penale “Shpërdorimi i detyrës”.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
