Një 26-vjeçar i kërkuar nga drejtësia austriake, është arrestuar në Tiranë. Për kapjen e tij ishin të inkuadruara Njësia e Posaçme e Kërkimit ‘Fast’, si dhe Interpol Tirana, që fillimisht bënë të mundur lokalizimin e tij në lagjen “Ali Demi” dhe më pas arrestimin.
Gersi Halili u gjet në lagjen “Ali Demi”, tek tregu elektrik, ku kishte marrë me qira një banesë.
I riu me origjinë nga Peshkopia, por që kishte shtetësi austriake kërkohej për trafik narkotikësh dhe substancash psikotrope. Kapja e tij është bërë me qëllim ekstradimin drejt Austrisë.
Policia e Shtetit thotë se po vijojnë procedurat për ekstradimin e Halilit drejt Austrisë, ndërsa maksimumi i dënimit për veprën penale të tij është deri në 15 vjet heqje lirie.
