Kryetari i Kuvendi Gramoz Ruçi në një deklaratë për median tha se nesër në orën 11:00 mblidhet Këshilli i Mandateve për të shqyrtuar kërkesën e Prokurorisë.
Prokuroria për Krimet e Rënda ka dorëzuar në Kuvendin e Shqipërisë një kërkesë për heqjen e imunitetit të deputetit Saimir Tahiri, për të vijuar më pas me arrestimin e tij mbi çështjen Habilaj.
Por, çfarë parashikon Rregullorja e Kuvendit pas dorëzimit të kësaj kërkese?
Neni 13, pika 9 parashikon:
– Këshilli për Rregulloren, Mandatet dhe Imunitetin përbëhet nga 10 deputetë, të emëruar nga Kryetari i Kuvendi, pasi ka marrë mendimin e kryetarëve të grupeve parlamentare, në mënyrë që të sigurojnë përfaqësim të barabartë mes shumicës dhe opozitës parlamentare. Këshilli kryesohet nga Kryetari i Kuvendit.
– Këshilli studion propozimet për ndryshimin e Rregullores, jep mendime për çështje të interpretimit të Rregullores, sipas nenit 116 të kësaj Rregulloreje, si dhe për konfliktet në lidhje me kompetencat ndërmjet komisioneve të Kuvendit.
-Këshilli shqyrton të gjitha çështjet që lidhen me mandatin e deputetit dhe paraqet raportin përkatës në seancën plenare.
-Këshilli verifikon mandatin e deputetit dhe paraqet raportin përkatës në seancë plenare brenda 30 ditëve.
-Këshilli mblidhet në mënyrën e parashikuar nga kjo Rregullore për komisionet e përhershme.
