Mjekët e spitalit të Elbasanit kanë reaguar pas arrestimit të dy kolegëve të tyre, një ditë pas ngjarjes tragjike, ku vdiq një 25-vjeçare pas lindjes së foshnjës.
Policia e Elbasanit arrestoi dje Nikollaq Thano, 60 vjeç, reanimator dhe Mehmet Ibaj, 54 vjeç, kardiolog, të cilët do të gjykohen për “mjekim të pakujdesshëm” ndaj shtetases që humbi jetën.
Në shenjë proteste, mjekët e Spitalit të Elbasanit kanë pezulluar të gjitha operacionet, duke u shprehur se ndihen të pasigurtë. Sipas tyre, vdekja e së resë ishte e pashmangshme, ndërsa pritet që të dalë edhe përgjigjja e ekspertizës mjeko-ligjore.
Rexhina Debrova paraditen e djeshme solli në jetë fëmijën e saj të parë, pas një barre prej 42 javësh, që gëzon shëndet të plotë. Por ajo pati probleme kardiake një orë pas operacionit, që çuan në humbjen e jetës.
Familjarët kanë akuzuar mjekun kardiolog, pasi sipas tyre ai ishte vonuar për më shumë se një orë pasi ishte lajmëruar nga kolegët për rastin urgjent.
