Gjykata e Tiranës ka konfirmuar izolimin prej 90 ditësh për të burgosurit, që tentuan të arratiseshin nga burgu 313, ngjarje e ndodhur të dielën e kaluar. Skema e mirëorganizuar u tentua që të vihet në zbatim nga tre të burgosur në qelitë e institucionit të vuajtjes së dënimit “Jordan Misja” (313) në kryeqytet. Për Arbër Çekaj, Fatmir Pjetrin dhe Lulzim Çepelen u kërkua masa shtesë arresti për “tentativë arratisje” dhe “goditje për shkak të detyrës”. Çepele akuzohet për bashkëpunim, pasi tërhoqi vëmendjen e gardianëve gjatë tentativës për arratisje, duke tentuar të priste damarët.
Plani i arratisjes
Të tre kanë thënë se skema nuk është bërë në bashkëpunim, ndërsa iniciativën për këtë plan e ka marrë Fatmir Pjetri, i cili u shpreh se nuk i kishte komunikuar planin dy të burgosurve të tjerë. Arbër Çekaj ka pretenduar se në orarin e ajrimit, kishte dalë për të marrë ajër e jo se donte të arratisej. Sipas tij, kur pa Fatmir Pjetrin duke u larguar, e ka ndjekur në mënyrë instiktive dhe se gjatë ngjarjes, nuk ka goditur asnjë polic.
Ndërkohë, Çepele doli përpara trupës gjykuese, duke thënë se nuk ka qenë i përfshirë në skemën e arratisjes, por ishte i rënduar psikologjikisht për arsye familjare dhe theksoi gjithashtu se para disa kohësh, i vranë dhe nipin, duke tentuar kështu vetëvrasjen. Ai ka shtuar po ashtu, se tentativa e vetëvrasjes ndodhi gjatë orës 14:00 dhe nuk kishte si të bënte pjesë në arrati, kur kjo e fundit ndodhi në orën 15:00.
Nga dosja e prokurorisë mësohet se 3 të paraburgosur të tjerë janë nën hetim me dyshimet se kanë pasur dijeni për planin e arratisjes së Arbër Çekajt dhe Fatmir Pjetrit. Konkretisht, nën hetim nga Prokuroria për “Moskallëzim krimi”, janë Dritan Sinani, Elvis Fajzullahu dhe Bekim Bulica. Nën hetim janë vënë edhe 6 punonjës të policisë së burgjeve për “shpërdorim detyre”.
Nga veprimet hetimore ka rezultuar se me veprimin dhe mos veprimin nga ana e punonjësve të policisë Gëzim Rramushi, Sajmir Shahini, Bashkim Muça, Oldi Myzyri, Radion Maloku, Edmond Prenga, janë konstatuar elemente të veprës penale të “shpërdorimit të detyrës”, pasi ata nuk kanë ushtruar kontroll fizik dhe të mjeteve apo pajisjeve që i paraburgosuri Fatmir Pjetri kishte me vete. Konkretisht ai kishte çantën e kuqe, ku ndodhej litari dhe sendet e forta, atë të hekurit në itinerarin e ndjekur prej tij nga dhoma e tij deri në vendin që ka kërcyer nga taraca.
