Të tjera detaje kanë dalë lidhur me arratisjen e dy shqiptarëve nga burgu i Tirinthas në Greqi. Duke iu referuar mediave vendase, raportohet se mungesa e tyre u konstatua në orën 11.40 të paradites së djeshme nga zyrtarët e burgut.
Gjatë kontrollit, u vu re se dy shqiptarë, një maroken dhe 1 egjiptian arritën të arratiseshin, duke prerë kangjellat dhe më pas kishin dalë jashtë gardhit. Duke qenë se në periferi të burgut nuk ka asnjë masë sigurie, ata shpëtuan pa u vërejtur dhe ndjekur.
Autoritete greke kanë ngritur alarmin dhe janë vënë në ndjekje të tyre deri në orët e vona të natës, por kërkimet kanë rezultuar pa efekt.
Mësohet se shqiptarët e arratisur, janë përkatësisht 27 dhe 48 vjeç, të dënuar me 6 dhe 11 vjet burg.
Ndërkohë, 42-vjeçari maroken ishte dënuar me 8 vjet burgim për trafik lëndësh narkotike, ndërsa egjiptiani, 24-vjeç, ishte dënuar me 6 vjet për grabitje.
