Ndërkohë që po zhvillohen hetime për të zbuluar porositësit e 13 kilogramëve armatim, Krimet e Rënda dhe Antiterrori kanë kërkuar ndihmën e autoriteteve britanike për të marrë informacion mbi një shtetas të huaj, i cili sipas autoriteteve ka vizituar Shqipërinë për 3 ditë.
Mësohet se shtetasi britanik ka zhvilluar takime në Shijak në shoqërinë e një femre. Vizita e tij ka zgjatur nga data 20 deri më 23 gusht, ndërkohë që më pas shpjegohet se është larguar përmes aeroportit të Rinasit. Kamerat e sigurisë të aeroportit po verifikohen për të siguruar të dhëna shtesë, e për t’ia përcjellë më tej autoriteteve britanike.
Burimet për Top Channel thonë se paraprakisht rezulton se emrat e pritësve të pjesëve të armëve, kryesisht të tipit Kallashnikov, janë të dhëna false.
Si pritës në tre pakot e postuara nga Durrësi rezultojnë shtetasi bitanik Lauron Lee, që jeton në qytetin Uetford, si dhe Lauren Coules e Jake Marchant, që jetojnë në Bedford.
Dërguesit janë tre të moshuar që nuk kishin dijeni për çfarë kishte ndodhur, por të tre emrat e mësipërm janë shënuar në secilën nga pakot. Sipas burimeve dërguesi kryesor në Shqipëri është i kërkuari Neritan Faria, i cili ka përdorur Saimir Çullhajn për të dorëzuar pakot me armë në kompaninë ndërkombëtare.
Grupi hetimor dyshon se Çullhaj nuk thotë të vërtetën kur deklaron se nuk është i implikuar në trafik. Dosja po hetohet nga Krimet e Rënda.
