Skënder Damini, i cili është nga gjyqtarët i cili “zbuti” dënimin e Dritan Dajtit, i akuzuar për vrasjen e katër policëve më 2009-ën, është shoqëruar në polici, me urdhër të Prokurorisë së Krimeve të Rënda. Pas një kontrolli të imtësishëm të ushtruar në banesën e tij, i është gjetur e sekuestruar në cilësinë e provës materiale të një arme pa leje. Për këtë armë, ai do të merret në pyetje.
Gjyqtarit Skënder Damini iu kontrolluan banesat në Vlorë e Tiranë, dhe pas kësaj është dërguar në Drejtorinë Vendore të Policisë së Tiranës. Krahas municioneve, gjyqtarit i janë gjetur edhe një sasi parash.
Forcat speciale të policisë, mëngjesin e sotëm zhvilluan një aksion blic në 5 banesat e 3 gjyqtarëve, të cilët ulën dënimin e Dritan Dajtit.
U kontrolluan banesat e gjyqtarëve Skënder Damini, Aleks Nikolli dhe Petrit Aliajt, në bazë të operacionit ‘Forca e Ligjit’.
Këto kontrolle kanë ardhur pas informacioneve se gjyqtarët kanë abuzuar me detyrën, dhe kanë dhënë vendim në kundërshtim me ligjin, në favor të Dritan Dajtit. Operacioni u zhvillua në tre qytete të ndryshme, Lezhë, Tiranë dhe Sarandë.
