Opozita ka nisur organizimin në orët e para të ditës së sotme, ndërsa ka zbuluar edhe simbolin e protestës së sotme.
Është pikërisht Ardit Gjoklaj, 17-vjeçari i vrarë në landfillin e Sharrës, fotografia e të cilit është stampuar në një në një sipërfaqe 100 metra katrorë me mbishkrimin “Drejtësi për Ardit Gjoklaj”.
“Portreti gjigand i 17 vjeçarit Ardit Gjoklaj, i vrarë në landfillin e Sharrës, është simboli i viktimës nga mafia e plehrave!
Arditi ishte një 17 vjeçar që punonte ilegalisht dhe pa sigurime shoqërore në landfillin e plehrave në Sharrë. Ai ishte një biznes i përbashkët i një firme private me Bashkinë e Tiranës, që u promovua nga Erion Veliaj si burim punësimi i sigurt. Bashkia dhe firma e fshehën vrasjen aksidentale të Arditit për te fshehur përgjegjësinë penale dhe morale për vdekjen e Arditit, që punonte në landfill për të siguruar paratë për librat e shkollës. Deri tani nuk ka asnjë përgjegjës, sepse Kryetari i Bashkisë Erion Veliaj ka ndërhyrë për mbylljen e dosjes së vrasjes së të riut Gjoklaj nga mafia e plehrave!”, shkruhet në njoftimin e PD-së.
Ndërkohë, mësohet se policia ka hequr foton e madhe simbolike të protestës, ndërsa nuk ka dhënë arsye.
“Policia bashkiake dhe policia e shtetit heqin pankartën për Ardit Gjoklajt. “Bravo çunat” nuk dhanë asnjë shpjegim, por thanë se kemi urdhër ta bëjmë këtë”, shkruhet në njoftimin e PD-së.
