E pranishme në aktivitetin e Institutit për gratë në Politikën e Sigurisë Kombëtare dhe Ndërkombëtare, diplomatja amerikane, Leyla Moses Ones, ka kërkuar fuqizim të grave dhe rolit të tyre për çështjet e sigurisë. E ngarkuara me punë e SHBA-ve në Ambasadën Amerikane në Tiranë, ka deklaruar se gratë në mbarë botën kanë një rol thelbësor për të luajtur në ofrimin e sigurisë e proceseve të paqes. Ajo u shpreh më tej se zëri i grave duhet të përfshihet dhe perspektiva e tyre duhet të merret në konsideratë.
“Ky institut është shembulli i përsosur, pikërisht i asaj që pjesëmarrësit në programet tona bëjnë. Gratë në mbarë botën kanë një rol thelbësor për të luajtur në ofrimin e sigurisë, proceseve të paqes, luftën kundër terrorizmit dhe parandalimin e zgjidhjen e konflikteve.
Në fillim të qershorit, Shtetet e Bashkuara botuan Strategjinë e SHBA-ve për Gratë, Paqen dhe Sigurinë-një kornizë e gjerë mbarë qeveritare që artikulon angazhimin tonë për të mbështetur pjesëmarrjen domethënëse të grave në përpjekjet për sigurinë.
Kjo strategji u mandatua nga Akti Dypartiak i vitit 2017 për gratë, paqen dhe sigurinë, të cilin Kongresi ynë e miratoi për të rritur rolet e grave në të gjithë botën, në operacionet e paqes dhe sistemet politike, qytetare, ekonomike dhe të sigurisë. Ashtu siç po bën sot Instituti për Gratë në Politikën e Sigurisë Kombëtare dhe Ndërkombëtare, duke filluar një diskutim që do të çojë në veprim, në Shtetet e Bashkuara, organizatat e shoqërisë civile do të kenë një rol jetësor për të ndihmuar Departamentet e Shtetit të Mbrojtjes dhe të Sigurisë Kombëtare si edhe USAID-in për hartimin e planeve të zbatimit të strategjisë”, tha ajo.
“SHBA-të i kuptojnë shumë mirë sfidat strategjike me të cilat përballen gratë globalisht dhe pengesat për përfaqësim në udhëheqjen politike, dhunën e përhapur kundër grave dhe vajzave, pabarazinë e vazhdueshme. Por, këto çështje mund dhe do të tejkalohen me angazhimin tonë të përbashkët. Jemi entuziastë që jemi bashkuar me partnerë si ju, për të shqyrtuar potencialin e plotë të grave në siguri; për të ngritur tematikën e grave, paqes dhe të sigurisë si përparësi”, theksoi diplomatja e SHBA.
