Siguria në stadiumet shqiptare ka kaluar në dorë të policisë private, por që në ndeshjen e parë u përballëm me një situatë kaotike në Korçë ku tifozeritë u përleshën me njëra-tjetrën. Policia private nuk ishte në gjendje që të ruante rendin në stadium dhe iu desh që të ndërhynte policia e shtetit që të qetësoheshin gjakrat. Presidenti i Kukësit, Safet Gjici në një prononcim për faqen zyrtare të klubit ka trajtuar me shumë shqetësim këtë pjesë, pasi vihet në diskutim siguria e tifozëve në stadium. Ai shprehet se policia e shtetit duhet të garantojë mbarëvajtjen e ndeshjes,, në të kundërt duhet të bojkotojmë kampionatin.
“Unë e kam thënë që siguria në stadiumi nuk mund të bëhet me polici private. Është e pamundur. Nuk janë pjekur akoma kushtet në Shqipëri, dhe tifozeria nuk është ndërgjegjësuar akoma për të pasur siguri me polici private. Është e pamundur. Me Policinë e Shtetit kemi pasur probleme, edhe në vitet e kaluara. Nuk janë akoma kushtet e pjekura, për të hequr Policinë.
Zgjidhje është të rikthehet Policia e Shtetit në krye të detyrës, sepse ligji e përcakton qartë, që të garantojë sigurinë publike. Aty kemi të bëjmë me njerëz, me tifozë, futbolli është sport masiv. Ka shumë tifozë, vijnë lloj-lloj tifozi. Kemi pas shumë tifozë në Kukës, vinin në stadium, thyenin stolat, i merrte policia 2-3, e më pas i nxirrte. Ata përsëri ata punë bënin. Pavarësisht se në Kukës tifozët patën një qetësi, dhe nuk kishim ato probleme si në vitin e parë, nuk kemi pasur ngjarje të rënda. Por, në përgjithësi kur luajnë ekipet rivale, ato kryesore, do kemi përsëri probleme me sigurinë.
Jam dakord që të gjithë presidentët në Shqipëri, ne duhet të bllokojmë kampionatin nëse Policia nuk kthehet të ruajë stadiumet. Kemi të bëjmë me sigurinë publike. Jo pafundësisht mund të shkojë kjo gjë, pasi ka kosto edhe Policia. Këto ekipe mbahen për njerëzit, sepse në fund ne heqim dorë nga futbolli, dhe nuk ka më futboll. Të 10 ekipet e Superligës duhet të bllokojmë kampionatin nëse nuk rikthehet Policia.
Janë të pafuqishëm edhe nga ana financiare, është një kosto e madhe, në një kohë që nuk kemi asnjë ndihmë nga shteti për të mbajtur klubet. Zero ndihmë. Gjithçka, shpenzimet i kanë vetëm presidentët. Flas për Superligën, nuk e di për Kategorinë e Parë. Mesa di unë, 99% të ekipeve të Superligës, mbahen nga presidentët. Ne investojmë, por asetet janë të shtetit. Ne mbajmë një aktivitet që ka shumë kosto, dhe tani na shtohen edhe kostot e policisë private, dhe nuk është problemi, se ja e përballuam 3-4 ekipe, por nuk realizojmë dot atë që merret përsipër, siguria publike.
Tifozët kanë pasur sherre me Policinë e Shtetit, jo më pastaj me policitë private. Ato nuk i llogarisin private. Unë e di se çfarë është, sepse e kam pasur vetë, e di se sa siguri mund të bëjë, por me turma masive, nuk është e përgatitur. E patë çfarë bënë tifozët në Korçë. Duhej policia e shtetit të stabilizojë gjendjen. Sapo ka filluar kampionati, sepse kur të kalojnë 1-2 muaj, do fillojë të ketë akoma më shumë rivalitet. Unë i bëj thirrje kolegëve, presidentëve të klubeve, të mblidhemi, që Policia të marrë përsipër sigurinë, dhe nëse ata nuk reagojnë, ne duhet të bllokojmë kampionatin.” – deklaroi Gjici.
