Është anuluar koncensioni i aksit rrugor Thumanë-Kashar, i cili ishte përfituar nga ana e kompanisë Gener 2. Lajmi u përcoll gjatë mesditës, përmes një deklarate për mediat nga ana e ministres së re të Infrastukturës dhe Energjisë, Belinda Balluku.
Sipas ministres së sapozgjedhur Balluku, fondi i ndërtimit të kësaj rruge do të shkojë për Paktin për Universitetin.
“Ky është komunikimi im i parë zyrtar. Uroj që të kemi një bashkëpunim të shkëlqyer. Kam vendosur të bëj ndërprejen e Partneritetit Publik-Privat të aksit Kashar -Thumanë. Buxhetin e saj do t’ia dedikojmë Paktit për Universitetin. Për ne ky aks vazhdon të jetë i rëndësishëm”, u shpreh ministrja.
E pyetur për arsyet e kësaj vendimmarrje, Balluku deklaroi se me rëndësi mbetet gjendja e universiteteve në vend, dhe arsimi i lartë.
Ky është një nga vendimet e para të Ballukut, pasi i mori vendin Damian Gjiknurit, dhe premtoi se do të vijojnë projektet e nisura prej tij.
