Pas tre orësh, është mbyllur protesta e tretë qytetare e zhvilluar në Tiranë kundër projektit të ndërtimit në zonën e mbrojtur të Zvërnecit.
Tubimi u mbajt në Bulevardin “Dëshmorët e Kombit” dhe para Kryemninistrisë, ku protestuesit përsëritën kundërshtimin e tyre ndaj projektit, duke kërkuar anulimin e tij dhe dorëheqjen e qeverisë. Në përfundim të protestës, organizatorët njoftuan se mobilizimi do të vijojë edhe nesër, me protestën e katërt që do të mbahet në orën 18:00 përpara Kryeministrisë.
“Nesër më shumë”, ishte mesazhi që përcollën pjesëmarrësit në mbyllje të tubimit, duke bërë thirrje për një pjesëmarrje më të gjerë qytetare.
Gjatë protestës u mbajtën fjalime dhe u shpalosën pankarta kundër projektit në Zvërnec, ndërsa organizatorët deklaruan se reagimi qytetar nuk lidhet vetëm me këtë çështje, por edhe me një sërë ligjesh dhe vendimesh që, sipas tyre, favorizojnë investitorët në dëm të interesit publik.
Mes kërkesave kryesore të protestuesve ishin anulimi i projektit në Zvërnec, shfuqizimi i ligjit për investimet strategjike dhe i Paketës së Maleve, si dhe dorëheqja e qeverisë.
