Ndryshime të rëndësishme kanë ndodhur në botën e garave ku shpejtësia thyen limitet. Në Formula 1 janë miratuar disa ndryshime deri tani, por ajo që ka surprizuar ka qenë në MotoGP. Edhe aty do të nisin ndryshime të rëndësishme sa i përket Botërorit 2018, pasi nga ky sezon është vendosur që në disa gara të zhvillohen më pak xhiro.
Ky vendim është marrë pas ankesave që kanë patur mjaft pilotë në komisionin e sigurisë, ku kanë deklaruar se distanca e gjatë e garës është një problem për sigurinë e tyre në pistë. Bordi drejtues i motoçiklizmit ka vendosur që garat të cilat do të zhvillohen në pistat e Austin, La Mansh, Katalonjës, Brno dhe San Marino do të kenë nga një xhiro më pak se vjet, ndërsa në pistën e Jerez do të zhvillohen dy xhiro më pak se një vit më parë. Ndërsa në pistën e Valencia do të zhvillohen 3 xhiro më pak se zakonisht.
Kjo masë sigurie është marrë edhe për kampionatet e Moto 2 dhe Moto 3. Në kampionatin e Moto 2 do të jenë 9 gara më të shkurtra se vjet, ndërsa në atë Moto 3 do të jenë 7 gara që do të shkurtohen me nga një xhiro. Kjo ulje e numrit të xhirove në disa pista bëhet edhe për të konsumuar më pak gomat dhe për t’u dhënë mundësi pilotëve të jenë më agresivë në pistë.
