Mbrëmjen e djeshme, në emisionin “Open”, Xhisiela ka mohuar dhunën e Rexhepit, ndërsa shtoi se kallëzimet i ka bërë për shkak të xhelozisë, por gazetarja Anila Hoxha ka rrëzuar justifikimet e vajzës.
Gazetarja ka rrëfyer edhe një episod që ka ndodhur, kur së bashku me Eni Vasilin, i ka marrë intervistën vajzës. Ajo ndau me publikun një detaj. Kjo lidhej me faktin se Xhisiela kishte mashtruar kur kishte thënë se kishte ardhur në emision me taksi. E vërteta është se atë e kishin sjellë disa persona me një makinë.
“Ne ishim të dyja atje (i drejtohet Eni Vasilit), ishim jashtë dhe po prisnim Xhisielën. Kur e pyetëm me çfarë erdhe, na tha me taksi, por ne ishim atje dhe e pamë që nuk erdhi me taksi, por me një makinë tjetër, së bashku me disa persona të tjerë. Ne ishim aty, ishim dëshmitarë dhe e pamë kur Xhisiela u largua po me atë makinë. Kemi qenë të dyja atje, le t’ia themi të gjitha publikut”, u shpreh Anila Hoxha gjatë emisionit.
Gazetarja Hoxha theksoi se Xhisiela kishte paqartësi gjatë gjithë intervistës: “Vështirësitë më të mëdha i kishte kur fliste për denoncimet në Fushë-Krujë”.
Sipas gazetares, Xhisiela Maloku ndihet e kërcënuar, kjo edhe për shkak se jeton në një zonë të rrezikshme si Nikla.
“Ishte në fund të shtatorit kur policia u mburr që hyri në Nikël, dhe na shpërndau pamjet”, tha më tej gazetarja.
