Presidenti i Komisionit Evropian, Jean Claude Juncker tha se Shqipëria është ende larg hapjes së negociatave me BE-në. Por pavarësisht kësaj, Juncker deklaroi se është i impresionuar me reformat dhe me atë që po ndodh në vendin. Ai shtoi se Komisioni Evropian është i lumtur me atë që po ndodh në Shqipëri. Juncker theksoi se vitin tjetër do të vizitojë Shqipërinë. Gjithçka, Juncker e tha gjatë deklaratës për median që bëri së bashku me kryeministrin Edi Rama.
Deklarata e Juncker është diplomatike dhe nuk jep asgjë konkrete por gjithçka e lë evazive. Ai thotë “se për dy tre muaj në qoftë se gjithçka do shkoj si duhet do jemi shume pranë të rekomandojmë dhe nuk e thote prerazi që do të rekomandojë”. Po ashtu dhe deklarata e djeshme e Presidentit të Këshillit Evropian Donald Tusk kur tha se jemi me ju, por jo të gjitha kryeqytetet e BE-së ju presin si në Bruksel. Këtu kemi parasysh veton qe ka secili vend në rast anëtarësimesh të reja. Shtojmë këtu dhe një raport që doli së fundi i cili thoshte se Shqipëria mund të anëtarësohet në BE në vitin 2050. E gjitha kjo gjuhe diplomatike na lë të kuptojmë se anëtarësimi i Shqipërisë në BE do jetë shumë i largët.
“Folëm për progresin që Shqipëria ka bërë. Jemi të lumtur me atë që po ndodh në Shqipëri. Kam besim se këto muaj do vijojnë reformat. Unë jam i impresionuar nga progresi dhe mendoj se nëse vijojnë kështu dy tre muajt e ardhshëm ne do të jemi shumë pranë të rekomandojmë Shqipërinë. Kam qëllim të vizitoj Shqipërinë vitin e ardhshëm. Ia thashë këtë personalisht Ramës por do e them publikisht”, tha Juncker.
Ndërsa kryeministri Edi Rama tha se muajt e ardhshëm do të jenë thelbësorë për të pasur mundësinë për të hyrë në një fazë të re.
“Është nder të jem këtu, t’ju dëgjoj ju dhe të marr kuptimin e gatishmërisë suaj për të na mbështetur ne. Muajt e ardhshëm do të jenë thelbësorë për të pasur mundësinë për të hyrë në një fazë të re që do të jetë e vështirë por që është e nevojshme për të nisur bisedimet për anëtarësim. Jam krenar që kam arritur në Bruksel me rezultate të prekshme. Ajo që mund të them në fund është se e lë Brukselin me bindjen se rezultate më të prekshme na presin. Sfida na presin”, theksoi Rama.
